P. වාසු යනු සටන් ජවනිකා, විහිළු තහළු, ප්‍රේම කතා, පලිගැනීම්, දාමරිකත්වය ආදී සියලු ලක්ෂණයන් එකට එක් කරගනිමින් මසාලා ගණයේ වාණිජ චිත්‍රපටිය නිර්මාණය කිරීමෙහි ඉමහත් දක්ෂකමක් පෙන්වන අධ්‍යක්ෂකවරයෙක්. ඔහුගේ සෑම චිත්‍රපටියකම ඉහත සියලුම ගතිලක්ෂණ හෝ කිහිපයක් අඩංගු වීම අනිවාර්යයෙන්ම සිදුවන දෙයකි.  රජිණිකාන්ත් රඟපෑ චන්ද්‍රාමුඛී සහ කුසේලන් චිත්‍රපටිද P. වාසු විසින්ම අධ්‍යක්ෂණය කරන ලද චිත්‍රපටි ද්විත්වයකි.

මන්නන් යනු P.වාසුගේ අධ්‍යක්ෂණයෙන් මාස්ටර් ඉලෛරාජාගේ සුමියුරු සංගීතයෙන් සහ රජිණිකාන්ත්, විජයශාන්ති සහ කුෂ්බු සමග දමිළ සිනමාවේ එක් අග්‍රගණ්‍ය විකට තරුවක් වන Goundamani චරිත නිරූපණය කරන 1992 වසරේ තිරගත වුනු තවත් එක් සාර්ථක චිත්‍රපටියකි. ⁣මෙය 1986 වසරේ තිරගත වුනු අතිසාර්ථක කන්නඩ චිත්‍රපටියක් වන Anuraga Aralithu චිත්‍රපටියේ දමිළ ප්‍රතිනිෂ්පාදනයයි.

මන්නන් චිත්‍රපටිය වෙනුවෙන් සංගීතය නිර්මාණය කරනු ලබන්නේ මාස්ටර් ඉලෛරාජා මාස්ටර් වන අතර එම සියලුම ගීත සඳහා ගී පද රචනා කර තිබෙන්නේ වන පද්ම ශ්‍රී වාලි නම් ප්‍රවීණ ගීපද රචකයා විසින්ය. K.J. යේසුදාස් මහතා විසින් ගායනා කරනු ලබන “Amma Endru” ගීතය මන්නන් චිත්‍රපටියේ ගීතයකි. එම ගීතයත් ඇතුළුව S.P. බාලසුබ්‍රමානියම් සහ S. ජානකී ඇතුලු ජනප්‍රිය ගායක ගායිකාවන්ගේ හඬින් ගීතවත් වන අගනා ගීත හයක් මෙහි අඩංගුව ඇත.